5801 to 5900

5801. ప్రతిరేయీ పున్నమేనంటావు..నా మోము చూడందే పొద్దుపోదంటావు..! 
5802. శిశిరాన్ని బ్రతిమాలుకుంటున్నా..తను కదిలితే ఎదురుచూపులు ఫలిస్తాయని..
5803. ఎన్ని కళ్ళు గుచ్చుతున్నాయో..ప్రేమను నమ్మలేనంత గుడ్డిగా..
5804. విరహమై నే మిగులుతున్నా..విరజాజులు నన్నింతగా వేధిస్తుంటే..
5805. మౌనరాగాలే మన చూపులవిక..తొలివలపు మాటల్ని దాచేస్తుంటే..
5806. వసంతమిప్పుడు సుదీర్ఘం.. నీ కదలికలు వీక్షిస్తున్న నేపథ్యం..
5807. తీరాన గవ్వలు..సముద్రం ప్రేమతో మనకిచ్చిన కానుకలు..
5808. గాలివాటం మారినట్టుంది..సముద్రాన్ని సైతం అల్లల్లాడిస్తూ..
5809. అమ్మతో సమానమైంది తెలుగు..మమకారం లక్ష్యమవుతూ నా అక్షరాలందుకే..
5810. మాతృభాష తెలుగే..ఆంగ్లంపై వ్యామోహం చులకన చేసిందంతే..
5811. తెలుగు సొగసు తెలియాల్సి ఉంది..మాతృభాషపై రుచి మరగాలంటే.. 
5812. బంధీగానైనా నేనుండిపోతా..నీ ప్రేమతో నన్ను కట్టివేస్తానంటే..
5813. నిన్నల్లో దాచుకున్నా వలపులు..నిదానంగా నీకు పంచుదామని..
5814. రేపటి కవితలన్నిటా నువ్వే..మనసు మెచ్చిన భావానివైతే..
5815. అద్దంలో చూసుకో ముందైతే..కొన్ని నిరాశలు దూరమవుతాయి..
5816. ఆ ఒక్కడిలా మాట్లాడకు..నీకు నేనున్నానని నువ్వనుకుంటే..
5817. ఈనాటి నీ కలవరింతలే..రేపటి నా పులకరింతలు..
5818. విరహం ఒంటరయ్యింది..నా ఏకాంతంలో నువ్వు అడుగేయగానే..
5819. స్మృతులతోనే సావాసమిప్పుడు..ఒంటరితనం అనుభవానికొచ్చినందుకు..
5820. సంతోషాన్ని శృతి చేస్తున్నానిలా..నిన్నో అద్భుతంగా పాడుకోవాలనే..
5821. రాళ్ళు జవరాళ్ళైన భావన..జలపాతాలు తాకుతున్న చిలిపిదనానికి..
5822. నీ గారాలనే ఆలకిస్తున్నా..అనుభూతివై నన్ను మరిపిస్తున్నందుకే..
5823. ప్రతిపూటా పరిమళిస్తా..నువ్వొచ్చి ఆఘ్రాణిస్తానంటే..
5824. నిన్నామొన్నా చచ్చినవేగా..ఈరోజూ..రేపు గురించే చింతిస్తున్నా..
5825. తుమ్మెదలా నేను..పువ్వుగా నిన్ననుకొని చుట్టూ పెనవేస్తూ..
5826. రేయైనా నిద్దుర పోనీయవు..కలనైనా నిన్ను కెలకవద్దంటూ..
5827. నునుపైన చెక్కిళ్ళే నావి..కనుబాణాలను దూసి గిచ్చకలా..
5828. ఎక్కిళ్ళతో అల్లాడిపోతున్నా..నువ్వు తలపుకొచ్చి ప్రాణంపోతుంటే..
5829. పండని తాంబూలంలా నువ్వు..నోటికున్న రుచిని పోగొడుతూ..
5830. అబద్దాలకే తీపెక్కుతుంది మనసు..నిజం నిష్ఠూరంగా అనిపిస్తూ..
5831. పరిణయమన్న ప్రశ్నేముందిక..ప్రేమంతా తుడిచిపెట్టుకుపోయాక..
5832. మనసుకెంత వరమో..నచ్చినోరితో మనువైతే..
5833. కాలమాగిందనుకున్నా..నా మనసు రాయిగా మారిందని గమనించక..
5834. కధిప్పుడే మొదలయ్యేట్టుంది..నా కలలో వద్దన్నా నువ్వొస్తుంటే..
5835. మాట గానమయ్యంది..మౌనానికి స్వరమందించగానే..
5836. సంతోషం సగమయ్యింది..జీవితాస్వాదన కరువైనందుకే..
5837. నా అధరాలెప్పుడూ మధురాలే..నీ పేరుతో జతకట్టాయందుకే..
5838. నువ్వుంటే వేరే హారాలెందుకు..విశేషమై నీ చనువుండగా..
5839. సమస్యగా మిగిలున్నాను..నమ్మకం నిలబెట్టలేకనే..
5840.నా నవ్వులు పూమాలలే..నీ గుండెపై దండగా ఒదిగిపోయాక..
5841. ఎటుచూసినా మౌనం..కొన్ని రాగాలను నేర్పాలని వచ్చానిప్పుడు..
5842. ఎన్ని రంగులని పులిమేస్తావో..నన్ను నన్నుగా గుర్తుపట్టనివ్వనంటూ..
5843. నా వలపు నేసిన నక్షత్రాలు..రాతిరి నీ కన్నుల్లోని కలలు..
5844. ప్రేమపాఠం నేర్పమన్నప్పుడే అనుకున్నా..నాకో కలల యాతనిస్తావని..
5845. నిద్దుర కరువవుతోందిప్పుడు..మేల్కొల్పుకు ఆలశ్యమవుతానేమోనని..
5846. అద్దానిదే అతిశయం..నా అందాన్ని ప్రతికోణంలోనూ చూపిస్తోందని..
5847. అనుబంధమవుతూ అద్దం..నాలో నిన్ను చూపి దగ్గరవుతూ..
5848. హోలికాపునమ్మని స్మరించినందుకేమో..నీ కలలకంతులేని రంగులు..
5849. కలస్వనమూ కూజితమై వినబడింది..ప్రేమైక బృందావనములో..
5850. నీలిమేఘం గుర్తుకొచ్చినందుకేమో..మెరుపులు దాచుకుంటూ నా కన్నులు..
5851. ప్రేమక్కడ పరవశించింది..ఆనందాలు రాధామాధవులవగానే..
5852. అంబరమూ అందేట్టే ఉంది..నీ ఆనందం అతిశయించినందుకు..
5853. నా కనులిప్పుడు వెన్నెల సోనలు..రాతిరి రాగాలు గుర్తుకొచ్చి..
5854. ప్రతిరోజూ రంగేళీనే..పూటకో ఊహను మనసు హత్తుకుంటుంటే..
5855. ముప్పులన్నీ చెదిరిపోయాయి..దరిదాపుల్లో నువ్వున్నావన్న ధైర్యంతోనే..
5856. అనుబంధాలు పగటికలలే..ముడి బిగియని మూడుముళ్ళ బంధంలో..
5857. అద్దమూ సిగ్గుపడింది..నీ అందంలోని ఆంతర్యాన్ని చూసి..
5858. అలుగక తప్పదుగా ప్రతిసారీ..ఆనందపు విలువేమో తెలియాలంటే..
5859. కొన్ని వ్యధలు అనంతసాగరాలే..లోతు తెలీనంతగా ముంచేస్తూ..
5860. కన్నులకెంతిష్టమో..ఏ రూపంగా నువ్వు కలలోకొచ్చినా..
5861. అవునని ఒప్పుకుంటున్నా..కాదని కొట్టేయలేకనే..
5862. చింత తీరిందనుకుంటా..నా కవితలన్నిటా నువ్వు కొలువుంటానంటే..
5863. కాలమాగి మరీ చూస్తుంది..నీ ముచ్చట్లకేం మత్తు పూస్తావోనని..
5864. మానవత్వమొక్కటి చాలు..స్పందించే హృదయమున్నట్టే..
5865. చిరుదివ్వెనైనా చాలనుకున్నా..నీలో వెలుతురు నాలా మెరుస్తుందంటే..
5866. నిరంతర వేదనలో బంధాలు..అనురాగం ముక్కలై ఎడారవుతుంటే..
5867. ఆనందమదో రకం..నువ్వున్నప్పుడు రెట్టింపై..లేనప్పుడు మృగ్యమై..
5868. మరువమై పరిమళిస్తూ మది..నిన్నే ఊహిస్తోంది మరి...
5869. గుండె కరిగి నీరయ్యింది..కంటికి ప్రవహించక తప్పలేదందుకే..
5870. వెన్నెలంటే నువ్వే..చీకటంటే నేను భయపడతానని తెలిసేగా..
5871. మురిపాలు మనవైన చిలిపికథ..ముద్దరేసి మదినూపింది కదా..
5872. కలలకంతం లేదక్కడ..ఊహకి ప్రాణమొచ్చి రేయంతా అలరిస్తుంటే..
5873. చూపుల వలేసినందుకేమో..మనసుకి చిక్కింది అరుదైన మురిపెం..
5874. అనుభూతులు ఆరువేలు..నువ్వొక్కసారిటు చూపు విసిరితే..
5875. అక్షరాలలా కలిసొచ్చాయి..నిన్ను రాయాలని కలంపట్టగానే నేను..
5876. అందినట్టే ఉంది ఆకాశం..చందమామవై పక్కనే నడయాడుతుంటే..
5877. జీవితం సమమయ్యిందిప్పుడు..బాధకు వీడ్కోలిచ్చి ఆనందం మొదలవ్వగానే..
5878. ఊహల గుసగుసలు..నీ ధ్యాసలోనే ఉండిపొమ్మని కలవరింతలు..
5879. నీ కలలతో నేను..కలతలకు దూరంగా నేడు..
5880. ప్రేమెన్నడో దూరమయ్యింది..జ్ఞాపకమొక్కటీ మిగిలిపోయిందందుకే..
5881. గుండెను పెకిలిస్తారెందుకో కొందరు..జాలి చూపాలనే ముందుకెళ్ళినా..
5882. చెలిమికి చుట్టాన్నే..చేమంతినని చేయందిస్తే..
5883. ఊహయిందో కల..ఒక ఉదయం రెప్పలు విడగానే..
5884. ఆనందం విశాలమైంది..అందిన ఆకాశం నీలా నా పక్కనుంటే..
5885. అద్దానికి అతిశయమయింది..నీ అందాన్ని తనలో దాచుకుందని..
5886. ఎంతానందమో నాకు..అద్దం నన్ను నీలా చూపినప్పుడల్లా..
5887. ఆకాశం అబ్బురమనుకున్నా..నీలా నాకు అందనన్నాళ్ళూ..
5888. అపురూపమే భావం..అనుభూతయ్యావందుకే మరి..
5889. పరిమళించు క్షణాలలో మనం..ప్రతి జన్మకిలాగే కలిసుందాం..
5890. మధువనమే మనసు..తలపునైనా నువ్వుంటే..
5891. మైమరపునే నేను..మోహనంలో వర్ణించాక..
5892. ఊసుల ఊయలలో ప్రతినిత్యం..బంధం నిలవాలిలా కలకాలం..
5893. ప్రేయసి కరిగిపోతుంది..ప్రేమతో కౌగిలించినందుకే..
5894. మనసు నవ్వుకుంది..కల నిజమయ్యే సూచనలు వేకువందిస్తుంటే..
5895. పదిలంగా దాచుకున్నా గుండెని..నీ వలపంతటా నిండుందని..
5896. మధుర సంగీతంగా మారిపోలేనా..నువ్విష్టంగా ఆలపిస్తా నన్నంటే..
5897. ఆనందపు రసగుళికలే..నన్నలరించే నీ ముద్దు మాటలు..
5898. మనసు కోరిన మమత..నీలా నాకందిన అదృష్టమే..
5899. మనసు కబురు తీయన..నీ ఊసులనేగా ఆలకిస్తున్నది..
5900. విషాదాన్ని మోసేదేముందిప్పుడు..విరహానికి అలవాటుపడ్డాక..

5701 to 5800

5701. రంగులరాట్నంలా జీవితం..ఊగినంతసేపన్నా ఆస్వాదించమని..
5702. శిశిరమని మరచిపోతున్నా..నీ తలపుల్లో ముద్దయిపోతూ ప్రతిసారీ..
5703. వలపు మరకలు తుడవాలని లేదిప్పుడు..నీ తొలికవిత నా పేరైనందుకు..
5704. పట్నపు గాలి సోకినందుకేమో..పల్లె వాసన పడట్లేదిప్పుడు..
5705. విరియాలనుంది మనసంతా..పరిమళించమని నువ్వడుగుతుంటే..
5706. జీవితాన్ని గెలవాలనుకున్నా..మరణాన్ని జయించి..
5707. కొన్ని స్మృతులెప్పుడూ తీయనివే..మనసు నుండీ పంపలేమందుకే..
5708. స్మృతులతోనే నే కలిసుంటున్నా..మాట కలపలేనని నువ్వనుకున్నాక..
5709. నిద్దుర నటిస్తూ నేనున్నా..నీ మనసప్పుడైనా బైటపడుతుందని..
5710. విన్నపాలతోనే నువ్వెప్పుడూ..విపరీతాన్ని నాకంటగడుతూ..
5711. నా మనసుకెప్పుడూ స్వార్ధమదే..నీ అనురాగాలన్నీ నాకంకితమవ్వాలని..
5712. భావాలతోనే బంధమెప్పుడూ..అక్షరాలు ఆశువుగా కలిసొస్తుంటే..
5713. ద్వేషమెప్పుడో కదిలిపోయింది..ప్రేమను మదిలోకి ఆహ్వానించగానే
5714. అతని కౌగిలి దుప్పటి కప్పుకున్నందుకేమో..చలి చెంతకే రానంది..
5715. ఆ మనసులెప్పుడూ దూరమే..కలిపుంచేందుకో కారణం కావాలి..
5716. మాటలెన్ని ముద్రించాలో..నీ మౌనాన్ని కావ్యంగా రచించాలంటే..
5717. ఈ ఆరాధనిప్పటిది కాదులే..నీ ఊహలకు దాసోహమైనప్పటిదే..
5718. ఆనందానికి హద్దేముంది..ఆకాశమే కొలమానం కాలేనంటుంటే..
5719. పరువాలన్నీ పదాలయ్యాయి..నీ కవితల్లో చేరి తరించాలనుకొని..

5720. జ్ఞాపకాన్ని కృతిగా పాడుకున్నా..ఆనందాన్ని ఆస్వాదించాలనే అనుభూతిలో..
5721. వలసపోయిన ఆమని తిరిగొచ్చినట్లుంది..నీ నవ్వులన్నీ నాకోసమనుకుంటే.

5722. నేనో జ్వాలాతోరణం..నా చూపులు కార్తీకదీపాలని గుర్తిస్తే..

5723. రహస్యమై మిగిలిపోలేదందుకే..నీ ఊహగా నన్ను రాసుకుంటావని..

5724. హరివిల్లుకి అన్నవేమో నువ్వు..రంగులన్నిటా నన్నే నింపేస్తూ..

5725. జాబిలి జతగా నేనుండిపోతా..రేపోనాడు నన్ననునయిస్తావనే ఆశతో..

5726. నీ తలపులోనే తీర్చేసుకున్నా..మునుపు తీరని తపనంతా..

5727. మిగిలున్నా..వేకువకు విషాదమై విరహాన్ని మోయలేని సాలభంజికనై

5728. శూన్యాన్ని తిట్టుకోకుండా ఉండలేకున్నా..నీ వెలితి తీరేదెలాగని..

5729. ఆణిముత్యమే నువ్వు..అందమైన కళలన్నీ నీలోనే దాచుకొని..

5730. గుప్పెడునవ్వులు గుర్తొచ్చినందుకేమో..గల్లంతైన గుండె తిరిగి ఆడుతున్నట్లుంది..
5731. తన భావమే నాకపురూపం..నా ఆనందమతని అనుభూతి..
5732. వలపుకిన్ని రంగులేంటో..నిన్న లేని అందాలెన్నో నాలో నేడు..
5733. మనసు పులకింతలేంటో కొత్తగా..సొగసు చేసిన మాయకేమో..
5734. సౌందర్యమంటే అదేగా..నీ చిరునవ్వులు నా కన్నులో..
5735. ఉషస్సు తిరిగొస్తుందిగా..నిశీధిని ఒంటరిగా రాతిరికే ఒదిలేస్తూ..
5736. మౌనం అంగీకారమే..ఎవరవునన్నా..కాదన్నా..
5737. కాలవలవుతూ కన్నీరు..కంటిపాపల కాటుకను సైతం చెరిపేస్తూ..
5738. ఆకుచాటు పువ్వును నేను..దొంగచాటుగా పరిమళాలు పంచుతూ..
5739. రాతిరైతే చుక్కల చీర..చీకటికన్య ప్రత్యేకతను చాటుకుంటూ..
5740. నువ్వంటే అద్దమే..నా రూపాన్నలా చూసుకోనీ మరి..
5741. పెనువిషాదం సహజమే..నీవు లేని నేనున్న విరహానికి..
5742. నిత్యమల్లెలే నీ పూజకు..నా ఆరాధన నీకందాలనుకున్నందుకు..
5743. కన్నుల్లో ముత్యాలకు ఖర్చులేదట..కాలువలై ప్రవహిస్తోందందుకే కన్నీరు..
5744. పరిమళిస్తున్న గాలినడగాలి..నిన్నెప్పుడు తాకి తానొచ్చిందోనని..
5745. కలలో తీర్చుకుంటున్నా చిన్ని ఆశలు..మనసు దాటి నువ్వొచ్చేసావని..
5746. అలిగి అలిగి అలసిపోతున్నా..బుగ్గల్లో గులాబీలు బాగున్నాయన్నావని..
5747. ఎన్ని కవితలని రాయాలో..ఏ ఒక్కటీ నువ్వు అన్వయించుకోకుంటే..
5748. కలగానైనా మిగలాలనుకున్నా..నీ కథలో చోటివ్వనన్నావని..
5749. కడలి ప్రయాణం తప్పదు..గమ్యం ఆవలితీరానున్నప్పుడు..
5750. రహస్యాలన్నీ బట్టబయలే..కన్నీటికి మనసు దాచుకోవడం తెలీనందుకు..
5751. పదాలన్నీ పాడేసుకున్నా..అతని ప్రేమకు పాటతో నీరాజనమివ్వాలని...
5752. వేదనందుకే కరిగింది..కాస్త కన్నీరు మనసుని కడిగేయగానే..
5753. చరణమై కదలాలనుకున్నా_నీ పాటలో పల్లవి పెనవేసినందుకే..
5754. నెమలి ఫించమై నా దేహం..నీ హృదయం ముసిరేసిందని వినగానే..
5755. కన్నీరెంత ఖర్చయ్యిందో..నీలో చిరునవ్వులు పూయించాలనే ఆరాటంలో..
5756. తన అలుకైతే తీరనేలేదు..ఇక్కడి మాటలెంత అనునయించినా..
5757. మనసంటిన పరిమళాలు కొన్నే..నీ తలపులు మల్లెపూల సమానమవుతూ
5758. పగటికలలు ఒదలనంటూ నేడు..రాత్రైతే నిదురను తరిమేస్తూ..
5759. అపురూపమంటే నువ్వే..వెలుగులు నింపుతున్నవి నీ ఊహలైతే..
5760. మనసెప్పుడు సమన్వయం చేసిందో..చూపులు సంధిస్తున్నాయి సొగసునిప్పుడు..
5761. జ్ఞాపకాల ఆకలవుతోందిప్పుడు..నేనొంటరినని గుర్తొచ్చినప్పుడు..
5762. ఓ కలను రాయాలనుకున్నా..నీలా కలిసొస్తుందని తెలీక..
5763. ఎన్ని తపనలు దాచుకున్నానో..నీ దాకా చేర్చడమెందుకని..
5764. శిశిరాన్ని గుర్తుచేస్తావెందుకో..అసలే విరహంలో నేనుంటే..
5765. ఆమడదూరముంటేనేం..అరక్షణమైన తలపును మీటకుండా వదలవుగా..
5766.  మంచులో తడిచినట్టు మనసు..నీ పలకరింపు కలలోనిదైనా..
5767. కన్నీరు ఎర్రనవుతుంది..మనసు పరుగుతీస్తున్న ప్రవాహ వేగానికి..
5768. పువ్వులా నేనెప్పుడో మారిపోయా..పరిమళాస్వాదన నీకు పంచాలని..
5769. ఉప్పనైతేనేమి కన్నీరు..మదిలోని విషాదాన్ని నిశ్శబ్దంగా తరిమేస్తుందిగా..
5770. అనుగ్రహమంటే నీకేగా..సంతసాలన్నీ సందిట్లోకొచ్చిపడుతున్నాక..
5771. మొదలెట్టినప్పుడనుకోలేదు..ముగింపింత త్వరగా వచ్చేస్తుందని..
5772. తలపుల మహత్తిప్పుడే తెలిసింది..నీ తన్మయత్వంలో మునిగినందుకేమో..
5773. రాక తప్పలేదు వసంతానికి..కబురివ్వక శిశిరం కదలిపోయినా..
5774. నువ్వు నవ్విన ముత్యాలు నాలుగైతేనేమి..నా మనసైతే మెరిసిందిగా..
5775. సంసారపు కచేరీ సంపూర్ణమయ్యింది..సంగమ స్వరాలు సంగీతమయ్యాక..
5776. కలలెందుకు విచ్ఛిన్నమయ్యాయో..రేయైతే భయమేస్తోందిప్పుడు..
5777. మనసో మధుఫలాల తోట..పరిమళాల తీపి ప్రవహిస్తోందందుకే..
5778. ఏకాంతాన్ని ప్రేమిస్తుంటానందుకే..స్మృతుల సరిగలమనాలకించాలనే..
5779. దండలో దారంలా నువ్వు..పరిమళించేందుకు దారి వెతకడమెందుకో..
5780. నా పాటల పంచామృతమది..నెమరేసిన ప్రతిసారీ తీపినద్దుతుంటుంది..
5781. ప్రతీదినం దివ్యమే..గతాన్ని నెమరేసుకోకుంటే..
5782. అభిమానమెన్నడు గెలవాలో..అపార్ధాలు నిలయమైన ఇరుకు మనసుల్లో..
5783. కమలం నవ్వుకుందట..తన అందాన్ని పోల్చుకుంటూ ప్రేమించేవారిని చూసి..
5784. నీ కవనమంతా నేనేగా..నా హృదయాన్ని రాసిచ్చినందుకు..
5785. నా మనసొక బిలమే..తరచి చూచినప్పుడల్లా శూన్యముగా..
5786. వెన్నెల పూర్ణమైందట..కలువనూ జాబిల్లినీ కలిపినందుకు..
5787. జయించక తప్పలేదు జీవితాన్ని..అలలతో పోల్చుకొని ఎదురీదినందుకు..
5788. ప్రతిరేయీ పున్నమి కావాలనిపిస్తుంది..నీ కన్నులపండుగ నాకింపవుతుంటే..
5789. విధిని వెక్కిరించడం మానేయాలందుకే..జీవిత నాటకంలో రాణించాలంటే..
5790. కన్నీటిని రప్పించుకున్నా..ఆ కాస్త దురదని కడిగేసుకునేందుకే..
5791. ఎన్ని తపనలు నావైతేనేమి..నిన్నొక్కటీ కదిలించకపోయాక..
5792. కలవరమే మదికి..నువ్వు పిలిచినట్లనిపిస్తే సరి..
5793. దగ్గరకొస్తూ నువ్వు..గుండెచప్పుడు రెట్టింపవుతుందన్నా వినవు..
5794. వీడక తప్పదు తనువు..ఊపిరాగిన క్షణాల సంధి..
5795. మరువలేనివా స్మృతులు..నన్ను బాల్యానికి చేర్చే నెమలీకలు..
5796. నా భావమైతే ఒక్కటే..నిన్ననంతంలో  ముంచిన భాష్యాలుగా..
5797. కెరటమై నేనొస్తున్నా..చిలిపి అల్లరితో నిన్ను ముంచెత్తాలని..
5798. బంగారమని బుగ్గలూరిస్తావు..నీ లాలసతో నన్ను వెలిగిస్తావు..
5799. పరవశమే నేనెప్పుడూ నీ పదాలకి..శృతి చేసిన వీణనైనట్టుగా..
5800. ఊసులాడుతూనే ఉంటా మదిలో..నాలో ఊపిరయ్యావనే ఉల్లాసంలో..

Virus-free. www.avast.com